ಕನ್ನಡ ಪರಮಾರ್ಥ ಸೋಪಾನ
ಪರಮಾತ್ಮನ ಸಗುಣರೂಪದ ವರ್ಣನೆ ( ರಾಗ, ದೇಸ, ತಾಲ-ಕೇರವಾ )
ಕೃಷ್ಣಮೂರ್ತಿ ಕಣ್ಣ ಮುಂದೆ ನಿಂತಿದಂತಿದೆ
ಮಸ್ತಕದಲ್ಲಿ ಮಾಣಿಕದ ಕಿರೀಟ | ಕಸ್ತುರಿ ತಿಲಕದಿಂದೆಸೆವ ಲಲಾಟ ||
ಹಸ್ತದಿ ಕೊಳಲನೂದುವ ಓರೆನೋಟ | ಕೌಸ್ತುಭ ಎಡಬಲದಲಿ ಓಡ್ಯಾಟ
ಮಘಮಘಿಸುವ ಸೊಬಗಿನ ಸುಳೆಗುರುಳು | ಚಿಗರು ತುಲಸಿವನಮಾಲೆಯ ಕೊರಳು ||
ಬಗೆಬಗೆ ಹೊನ್ನುಂಗುರವಿಟ್ಟಿ ಬೆರಳು | ಸೊಬಗಿನ ನಾಭಿಯ ತಾವರೆಯರಳು
ಉಡುದಾರ ಒಡ್ಯಾಣ ನಿಖಿಲಾಭರಣಾ | ಬೆಡಗು ಪೀತಾಂಬರ ರವಿಶತಕಿರಣ ||
ಕಡಗ ಪೀತಾಂಬರ ಗೆಜ್ಜೆಗಳನ್ನಿಟ್ಟ ಚರಣ | ಒಡೆಯ ಶ್ರೀ ಪುರಂದರವಿಠಲನ ಕರುಣಾ
ಕನಸಿನ ದರ್ಶನ ( ರಾಗ-ಶಂಕರಾಭರಣ, ತಾಲ-ಅಟತಾಲ )
ಕಂಡೆನಾ ಕನಸಿನಲಿ ಗೋವಿಂದನ
ಕಂಡೆನಾ ಕನಸಿನಲಿ ಕನಕರತ್ನದ ಮಣಿಯ ನಂದನ ಕಂದ ಮುಕುಂದನ ಚರಣವ
ಅಂದುಗೆ ಕಿರುಗೆಜ್ಜೆ ಘಲಿರೆಂಬ ವಾದ್ಯದಿ | ಬಂದು ಕಾಳಿಂಗನ ಹೆಡೆಯನೇರಿ ||
ಥಿಂ ಧಿಮಿ ಧಿಮಿಕೆಂದು ತಾಳಗತಿಗಳಿಂದಾ | ನಂದದಿ ಕುಣಿವ ಮುಕುಂದನ ಚರಣವ
ಉಟ್ಟ ಪೀತಾಂಬರ ಉಡಿಯ ಕಾಂಚಿಯ ದಾಮ | ತೊಟ್ಟಿ ಮುತ್ತಿನ ಹಾರ ಕೌಸ್ತುಭವು ||
ಕಟ್ಟಿದ ವೈಜಯಂತೀ ತುಳಸಿ ಮಾಲೆ | ಇಟ್ಟ ದ್ವಾದಶನಾಮ ನಿಗಮಗೋಚರನ
